Psalms 139

Kumqondisi wokuhlabela. ElikaDavida. Ihubo.

1Oh Thixo, usungihlolile
usungazi.
2Uyakwazi lapho ngihlala lalapho ngiphakama;
uyayibona imicabango yami lanxa ukhatshana.
3Uyananzelela ukuphuma kwami lokulala phansi kwami;
uzazi kuhle zonke izindlela zami.
4Ilizwi lingakabi khona elimini lwami
usulazi lonke, wena Thixo.
5Uyangihonqolozela emuva laphambili;
ubekile isandla sakho phezu kwami.
6Ukwazi okunje kungumangaliso kimi,
kuphakeme kakhulu ngeke ngikufinyelele.

7Ngingaya ngaphi ngisuke eMoyeni wakho na?
Ngingabalekela ngaphi ngisuke kuwe na?
8Ngingakhuphukela emazulwini, ukhona lapho;
nxa ngilala ezinzikini, ukhona lapho.
9Aluba ngindiza ngamaphiko okusa,
aluba ngisehlela ngaphetsheya kolwandle,
10lalapho isandla sakho sizangikhokhela,
isandla sakho sokunene sizangibamba singiqinise.
11Nxa ngisithi, “Ngempela ubumnyama buzangifihla
ukukhanya kube yibusuku eduze kwami,”
12lalobo bumnyama kabukuba mnyama kuwe;
ubusuku buzakhanya njengemini,
ngoba ubumnyama buyikukhanya kuwe.

13Ngoba wadala ingaphakathi yobuyimi;
wangiphetha kuhle ndawonye esiswini sikamama.
14Ngiyakudumisa ngokuthi ngabunjwa ngesimanga esesabekayo;
iyamangalisa imisebenzi yakho,
lokho ngikwazi kamhlophe.
15Isimo samathambo ami sasingafihlekanga kuwe
lapho ngangisenziwa endaweni esithekileyo.
Lapho ngangiselukelwa ndawonye ezinzikini zomhlaba,
16amehlo akho awubona umzimba wami ungakabi lesimo.
Zonke insuku ezamiselwa mina zabhalwa encwadini yakho
lalunye lwazo lungakabi khona.
17Iligugu elinganani kimi imicabango yakho, Oh Nkulunkulu!
Bukhulu kanganani ubunengi bayo!
18Aluba ngingayibala
ingedlula ubunengi bezinhlamvu zetshebetshebe.
Ngithi nxa ngivuka ngibe ngilokhu ngilawe.

19Ungasake ubabulale ababi, awu Nkulunkulu!
Sukani kimi lina bachithi begazi!
20Bakhuluma ngawe beqonde ububi;
abakuphikisayo badlala ngebizo lakho.
21Kangibazondi yini abakuzondayo na Oh, Thixo,
ngibenyanye labo abakuvukelayo na?
22Ngiyabazonda ngenzondo yonke;
ngithi bayizitha zami.
23Ngihlola, Oh Nkulunkulu, uyazi inhliziyo yami;
ngizama ukuze wazi ukunqineka kwemicabango yami.
24Ake ubone ingabe kulendledlana embi kimi,
ungihole ngendlela yaphakade.